Happy New Year 2012

2011 سنة حملت لي الكثير من اللحظات الجميلة.. الآمال.. النجاح.. الفشل، وكانت أفضل من 2010 الحمدلله..

الأشياء الإيجابية:
- تقريباً صرت ديمقراطية شوي.. وطبع الدكتاتورية بلش يختفي من شخصيتي :$
- لقيت وايد ناس أحبهم يمي.. ساعدوني ابوايد شغلات.. أقولهم ثانكيوووو وجودكم ابحياتي شي حلو ومهم :)

- أول مرة أوافق اني اطلع في رمضان على الفطور.. طلعت 3 مرات وكنت مستانسه :)
- تعمقت في مجال وظيفتي أكثر وعرفت اشياء يديدة ولقيت الدعم الحمدلله.. يعني صرت مهمه أكثر P;

- بلشت تدوين.. وتعرفت على زملائي المدونين "اللي ساعدوني واااايد  صج ثانكيو"

- شاركت في حملة "Give" في محاولة لرسم البسمة على وجوه الأطفال المصابين بالسرطان

- فكرت جدياً في استخدام بعض هواياتي في مجال العمل.

- الحين اقدر أطول بالي على وايد شغلات أكثر من أول.

- بلشت اكل سمج.. واكلات ما كنت اكلها من قبل.

- مامرضت وايد "ماشالله لا أحسد روحي"

الأشياء السلبية:

- درست اللغة الفرنسية بس للأسف فشلت فيها، يعني ماعرف اسولف تقريباً

- قرار فسر بطريقة عكسية بس لأني فكرت بمنطقية!!

- فشلت في زيادة وزني 5 كيلوات بس

- للحين ما اعرف اصفط / اسفط "مادري اشلون تنكتب" السيارة عدل وماحب اسوق بس للضرورة...

- ظهور مخلوقات غريبة في حياتي!!!!!

الأشياء المضحكة:

- سويت وايد انترفيوات ومن بينهم كان في مدير ماعنده وظايف معينة.. يعني عقب ما يقابل الشخص يحدد له مسمى وظيفي ويعينة عنده ويقول لا تقدم استقالتك ابوظيفتك الحالية عشان اذا فشلت عندنا ما تخسر وظيفتك وللعلم انهم المفروض مو شركة صغيرة لووول!!! 

- بنت خالتي "غدير" وايد تفلسف على نظافة السيايير.. واهم شي بالموضوع كله إنه طلع لنا زهيوي ابسيارتها كان قاعد يطير علينا.. بس الحمدلله كنا يم باب بيتهم :$

- قبل عيد ميلادي بيومين مديرة الـ HR قالت تبينا باجتماع،، قلت أكيد جكتني أتأخرعلى الدوام كل يوم.. بس الحمدلله كان الاجتماع عبارة عن كيكة وشموع :))

الأشياء اللي لازم اسويها:

- يوصل وزني لي الـ 50

- أعدل اللغات اللي عندي، ما أقط بدليات كلش.. وعقب ابلش ادرس اللغة الخامسة.

- أقعد الصبح امبجر وما أتأخر على الدوام.

- أغير وظيفتي وأروح على شي أعلى يعني مديرة تسويق وعلاقات عامة مثلا P;

- أفكر عدل قبل لا أقرر

- وايد أكل...

و كل عام وانتم بخير.. انشالله سنة 2012 تكون سنة خير علينا وعليكم :)